जनकपुरधाम । धनुषाको जनकनन्दनी गाउँपालिकामा अपांगता भएका बालबालिकाहरुको पहिचान सम्बन्धी चार दिने तालिम सुरु भएको छ । गाउँपालिकाका उपाध्यक्ष कमला सहगलले उद्घाटन गरेपछि जनकनन्दनी–६ खजुरीस्थत स्वास्थ्य चौकी सभाहलमा शनिबारदेखि तालिम सुरु भएको हो । मंगलबार सम्पन्न हुने तालिममा जनकनन्दनी गाउँपालिकाका १५ जना प्रअ र शिक्षकहरुको सहभागिता रहेका छन् । प्लान इन्टरनेशनल नेपालको सहयोगमा आसमान नेपालले बालविवाह न्युनिकरण परियोजनाको पूरक परियोजनाः समावेशी शिक्षा परियोजना अन्तर्गत सो तालिम आयोजना गरिएको हो ।
अपांगता भएको बालबालिकालाई विद्यालयमा नियमित गर्न तालिम महत्वपूर्ण हुने आसमान नेपालका घुरन यादवले बताए । विद्यालयलाई अपांगमैत्री बनाएर यस्ता बालबालिकालाई नियमित गर्ने उद्येश्यले तालिमको आयोजना गरिएको यादवले थपे । पालिकाका सामुदायिक विद्यालयहरु अभैm अपांगमैत्री हुन नसक्दा यस्ता बालबालिकालाई नियमित विद्यालय आउन समस्या भएको हो । जसले गर्दा उनीहरुको सिकाई उपलब्धी कमजोर पाइएको छ । विद्यालयमा अपांगता भएका बालबालिकाको तथ्यांक संकलन गरेर उनीहरुलाई सहयोग पुग्ने र पठनपाठनमा असहज नहुने गरी कार्यक्रमहरु गर्ने बारे तालिममा जानकारी दिने प्रशिक्षक रामलाल धामीले बताए । तालिमको सहजिकरण आसमान नेपालका फिल्ड सुपरभाइजर राम मनोहर मोचीले गरेका छन् ।
