धनुषाको विदेह नगरपालिकामा एक दलित परिवारमाथि मरनासन्न हुनेगरि निर्घात कुटपिट गरिएको छ । विदेह नगरपालिका–३ गोबराहीका स्थानीय सवाई दासका श्रीमती, बुहारीलगायत घरमा रहेका वृद्धवृद्धा समेत कुटपिटबाट गम्भीर घाइते भएका छन् ।
उनीहरुलाई पूर्व प्रधानपञ्च हरी कुसियैतका छोरा रोशन कुसियैत, बिटु कुसियैत र भतिजा दुर्गेश कुसियैतले निर्घात कुटपीट गरेको पीडित परिवारले आरोप लगाएका छन् । सोमबार साँझ भएको सामान्य विवादमा कुसियैत परिवार दास परिवारमाथि घरमै प्रवेश गरेर कुटपिट गरेको पीडित रामशरण दासले बताए । उनीहरुको कुटाईबाट ४५ वर्षीय निलमदेवी दास, २४ वर्षीय रामशरण दास र रामभगत दास घाइते भएका छन् । निलम देवीमाथि निर्घात कुटपिट भएकाले उनलाई उपचारका लागि जनकपुरस्थित काव्य अस्पतालमा भर्ना गरिएको छ ।
कुसियैत परिवारले सामान्य विवाद भएपछि सदा परिवारको घरमै प्रवेश गरेर परिवारका सबै सदस्यमाथि हातपात गरेको पीडित रामशरणको आरोप छ । कुटपिट गर्ने कुसियैत परिवार पहिलादेखि नै जमिन्दारी शैली देखाउँदै आएको पीडितको भनाइ छ । कुटपिट गर्नेहरुमाथि कारबाहीका लागि दुहबी गोबराही प्रहरीचौकीमा पीडित परिवारले निवेदन दिएको बताएका छन् । तर कुटपिट गर्नेहरुलाई पक्राउ गर्न प्रहरीले आनाकानी गरेको पीडितको अरोप छ ।
यता दुहबी प्रहरीचौकीका सई हिलम सिंह दनुवारले दुवै पक्षबीच ज्यालाको लागि विवाद भएको र विवादमा कुटाकुट हुँदा दुबै पक्षका व्यक्तिहरु घाइते भएको बताए । कुसियैत परिवार पक्षका पनि तीनजना घाइते भएर अस्पताल भर्ना भएको उनले बताए । दुर्गेश कुसियैत र निज पञ्चका छोरा बिहारमा रक्सी बन्द भएदेखि प्रहरीप्रशासनको मिलोमतोमा रक्सी, मरिच, इलाइची लगायतका सामानहरु स्मगलिङ्ग गरिरहेको आरोप समेत लगाइएको छ ।
घटना सम्बन्धमा जसपाका नेता राजिव झाले भने,‘केही दिन देखि लगातार दलितहरुमाथी आक्रमण बढिरहेको छ । नेपालमा दलितको लागि लोकतन्त्र छ कि छैन भन्ने सोचनिय अबस्था आएको छ ।’
तपाईको प्रतिक्रिया !