सडक ढलानको शिलान्यास गर्दै नगरप्रमुख मण्डल

जनकपुरधाम । धनुषाको हँसपुर नगरपालिका वडा नं. १ ननुपट्टीको मेनसडक ढलान हुने भएको छ । नगरप्रमुख रामज्ञान मण्डलले बुधबार एक कार्यक्रमका बीच सडक ढलानको शिलान्यास गरेका हुन् । सडक ढलानको शिलान्यास गर्दै नगरप्रमुख मण्डलले सडक ढलान भएपछि गाउँबासीलाई हिलो र धुलोमा हिड्नुपर्ने बाध्यता नरह्ने बताए । विकास निर्माण कार्यमा लामो समयदेखि लागेको ब्रेक जनप्रतिनिधिहरुले तोडेको उनले बताए । नगर विकासको लागि आपूm प्रतिबद्ध छु, उनले भने–यसको लागि सबैको सहयोगको अपेक्षा छ ।’ विकास निर्माण कार्यमा राजनीति भए, त्यसको क्षति आमजनताले व्यहोर्नुपरेको हुन्छ उनले भने । विकास निर्माण कार्यलाई सबैले अगाडी बढाए मात्र विकसित समाजको निर्माण गर्न सकिने उनको तर्क थियो । वडा नं. १ का वडाध्यक्ष कामेश्वर कापरको अध्यक्षतामा भएको शिलान्यास कार्यक्रममा नगरप्रमुख मण्डलले हंसपुर नगरपालिकाले विकास निर्माण कार्यलाई द्रुत गतिमा अघि बढाएको बताउँदै आउँदो आर्थिक वर्ष थप प्रभावकारी योजनाहरु ल्याउने प्रतिबद्धता जनाए । ४० लाखको लागतमा २ सय ३३ फिट लामो र १६ फिट चौडा सडक ढलान हुन लागेको हो । शिलान्यास कार्यक्रममा वडा नं. ३ का वडाध्यक्ष उदय सिंह, रामकृपाल कापर, पंचा कापर, लोचन कापर लगायत स्थानीयहरुको उपस्थिति रहेको थियो ।