फाल्गुन ७ गते । प्रदेश २ का मुख्यमन्त्री मोहम्मद लालबाबु राउतले संघीयताप्रति शासकहरुको अरुची नै संघीयता कार्यान्वयनको प्रमुख बाधा रहेको टिप्पणी गर्नुभएको छ । जनकपुरधाममा आजबाट सुरु भएको प्रदेश २ का स्थानीय निकायका प्रमुख प्रशासकीय अधिकृतको प्रशिक्षण कार्यक्रमको उद्घाटन समारोहमा मुख्यमन्त्री राउतले उक्त धारणा राख्नुभएको हो ।
मुख्यमन्त्री राउतले शासकहरुको संघीयताप्रतिको अरुची नै संघीयता कार्यान्वयनको प्रमुख चुनौती रहेको बताउनुभयो ।
स्थानीय तह संस्थागत् क्षमता स्वमूल्याङ्कन कार्यक्रममा उहाँले संविधान, कानूनको अधीनमा रहेर नागरिक हितमा काम गर्न आग्रह गर्नुभयो । प्रदेश २ का करिब ४० स्थानीय तहका प्रमुख प्रशासकीय अधिकृतको सहभागिता रहेको प्रशिक्षण कार्यक्रम तीन दिनसम्म चल्नेछ । प्रशिक्षण कार्यक्रमको उद्घाटन समारोहमा प्रदेश नीति आयोगका उपाध्यक्ष डा. भोगेन्द्र झा, मुख्यमन्त्री तथा मन्त्री परिषद् कार्यालयका प्रमुख गोकर्ण दवाडीले सम्बोधन गर्नुभएको थियो ।
