काठमाडौँ जिल्ला प्रशासन कार्यालयले काठमाडौँको कोटेश्वर, बल्खु र सिफल बाहेक चक्रपथ भित्रका कुनै पनि क्षेत्रमा धर्ना जुलुस, विरोधका लगायतका कुनै पनि कार्यक्रम गर्न रोक लगाएको छ।
काठमाडौं जिल्लाको चक्रपथ र चक्रपथ भित्रका सार्वजनिक स्थानमा भेला जम्मा भई अनसन, धर्ना, घेराउ, जुलुस, प्रदर्शन तथा सभा लगायतका विरोधका कार्यक्रमहरू आयोजना गर्दा अत्यावश्यक सेवा, सार्वजनिक सेवा प्रवाह र सार्वजनिक यातायात सञ्चालनमा कठिनाई भएको भन्ने जनगुनासो समेतलाई मध्यनजर गर्दै यस्तो निर्णय लिइएको प्रशासनले जारी गरेको सूचनामा उल्लेख छ ।
जिल्ला सुरक्षा समिति काठमाडौंको सिफारिस समेतका आधारमा स्थानीय प्रशासन ऐन, २०२८ को दफा ६ को उपदफा
(३क) बमोजिम मिति २०८२/०२/१९ गतेदेखि लागु हुने गरी राजधानी काठमाडौँको सिफल चौर क्षेत्र,कोटेश्वर आकाशे पुलदेखि दक्षिण बालकुमारीतर्फको क्षेत्र र बल्खु क्षेत्र बाहेका क्षेत्रमा बढीमा २ महिनासम्मका लागि विरोधका कार्यक्रम गर्न निषेध गरेको आदेश जारी गरिएको छ।
