महोत्तरीको लोहारपट्टी नगरपालिकामा जबरजस्ती गरिने विवाह न्युनिकरण तथा बालविवाह अन्त्यका लागि कानून कार्यान्वयनमा सहयोग पुर्याउने अभिभावकहरु सम्मानित भएका छन् । लोहारपट्टी नगरपालिका वडा नं ९ का बालअधिकार समितिका संयोजक समेत रहेका वडाध्यक्ष श्रीनारायण यादवको अध्यक्षतामा बुधबार आयोजित एक कार्यक्रमका बीच उनीहरुलाई सम्मानित गरिएको हो ।
बालविवाहमुक्त नमूना लोहारपट्टी नगरपालिका बनाउन बालविवाह नगर्ने तथा नगराउन पैरबी गर्ने किशोरीहरु र २० वर्षपछि छोरीको विवाह गर्ने अभिभावकका लागि वार्षिक रुपमा पुरस्कार तथा सम्मान कार्यक्रममा वडाका ९ जनालाई सम्मान गरिएको थियो । वडा नं. ९ ले आयोजना गरेको कार्यक्रममा बालविवाह विरुद्धको अभियानमा सहयोग पुर्याएका अभिभावकलाई सम्मान गर्दै नगरपालिकाका नगर उपप्रमुख सरिता शर्माले बालविवाह विरुद्धको अभियानमा सबैको सहयोग अपरिहार्य रहेको बताइन् । स्थानीय सरकारले बालविवाह जस्तो सामाजिक कुरीति विरुद्ध अभियान अगाडि बढाएकोले यसमा सबैलाई सहयोग गर्नको लागि उनले आग्रह गरिन् । लोहारपट्टी नगरपालिकालाई बालविवाहमुक्त पालिका घोषणा गर्ने उद्येश्यले पालिकाले यसको लागि विभिन्न जनचेतनामूलक कार्यक्रमहरु संचालन गरिरहेको उनले जानकारी दिइन् ।
सो अवसरमा वडाध्यक्ष यादवले वडामा बालविवाहको घटना न्युनिकरणमा किशोरकिशोरीसँगै अभिभावकले पनि महत्वपूर्ण भूमिका निर्वाह गरिरहेको बताए । पिपराढी गाउँमा बालविवाह जस्तो सामाजिक अपराध नियन्त्रण गर्नमा स्थानीयबासीको योगदान महत्वपूर्ण रहेको यादवले बताए ।
कार्यक्रममा अभिभावकहरुलाई प्रमाणपत्र प्रदान गर्दै लोहारपट्टी नगरपालिकाका प्रमुख प्रशासकीय अधिकृत बदरुल अंसारीले बालविवाहलाई सामाजिक विकृतिको संज्ञा दिदै यसको विरुद्ध सबै पक्षको सहयोग आवश्यक रहेको बताए । कुनै एक पक्षले चाह्दैमा सामाजिक रुपान्तरण सम्भव छैन्, उनले भने–यसको लागि समाजको सबै वर्गको सहयोग जरुरी छ । सबै पक्षले सहयोग गरेमा बालविवाह पूर्ण रुपमा रोक्न सकिने उनले दावी गरे ।
तपाईको प्रतिक्रिया !