मंसिर शुक्ल पञ्चमीको तिथमा पर्ने रामजानकी विवाहपञ्चमी महोत्सव जनकपुरमा भब्यताका साथ मनाइदै छ । विवाहपञ्चमीको अवसरमा जनकपुर उत्सवमय बनेको छ ।
त्रेता युगमा मर्यादा पुरुषोत्तम भगवान श्रीरामचन्द्रले मंसिर शुक्ल पञ्चमीको तिथिमा राजा जनककी पुत्री जानकीसित जनकपुरमा धनुष तोडेर विवाह गरेको थियो र सोही स्मरणमा प्रत्येक वर्ष मंसिर शुक्ल पञ्चमीलाई विवाहपञ्चमी महोत्सवको रुपमा धुमधामपूर्वक मनाइने गरिएको छ । विवाहपञ्चमीको अवसरमा जानकी मन्दिरलाई भब्यतापूर्वक सजाईएको छ ।
निरन्तर दुइ साताको तयारी पछि जानकी मन्दिरलाई महोत्सवको अवसरमा केन्दंीत गरी राम्ररी सिंगारिएको हो । चारैतिर विद्युतीय रंगीबिरंगी बत्तीहरु लगाइएको छ । विवाहमहोत्सवमा सहभागि हुन पछिल्ला वर्षहरुको अपेक्षा यसवर्ष भारी संख्यामा श्रद्धालु तथा भक्तजनहरु जनकपुर आईपुगेका छन् । श्रद्धालुहरुको भारी उपस्थितिले विशेष उत्साह तथा आकर्षण थपिएको छ । पश्चिमी नेपालदेखि पूर्वको झापासम्मका तथा भारतको बिहार, बंगाल, उत्तरप्रदेशबाट श्रद्धालुहरु विवाहमहोत्सव हेर्न जनकपुर आएका छन् । विवाहमहोत्सवलाई लिएर जानकी मन्दिरदेखि रंगभूमी मैदानसम्म मात्रै एकसयभन्दा बढी सुरक्षाकर्मी परिचालन गरिएको धनुषाका प्रहरी उपरिक्षक चक्र बहादुर सिंहले जनाए ।
मध्यान्ह १२ बजे जानकी मन्दिरको मूल ढोका खुलेपछि अयोध्याबाट जन्तीको रुपमा आएका सन्तमहन्थहरुलाई जानकी मन्दिरका महन्थ राम तपेश्वर दासले नयाँ वस्त्र उपहारको रुपमा प्रदान गरे । पछि किशोरीको डोलासँगै हजारौंको संख्यामा श्रद्धालु भक्तजन रंगभूमि मैदानतिर पुगेको थियो । रंगभूमी मैदानमा राममन्दिरबाट पुगेको श्रीरामको डोलाले किशोरीको डोलालाई परिक्रमा गरेपछि विवाहमहोत्सवका लागि जानकी मन्दिरको प्राङ्गणमा डोलाहरु राखिएको छ ।
मन्दिरका महन्थ दासले मिथिला संस्कृतिमा छोरीको विवाहमा गरिने प्रत्येक विधि र वैद्धिक मन्त्रोच्चारण गरेर राति रामजानकीको विवाह हुने बताए । विवाहको लागि जानकी मन्दिरको प्राङ्गणमा गंगासागरबाट शनिबार मटकोर गरेर ल्याइएको माटोले वेदी तयार गरिएको छ । वेदीलाई रंगीबिरंगी फूल तथा बत्तीले सजाईएको छ ।
वेदी वरिपरि विवाह हेर्न आएका हजारौं श्रद्धालुहरुको लागि बस्ने ब्यवस्था गरिएको छ ।
रामजानकी विवाहोत्सवको माहौल तयार हुदा सम्म नगर दर्शन, धनुष यज्ञ, तिलकोत्सवमा सम्धी मिलन र मटकोर लगायतका कार्यक्रमहरु ग्रिएको थियो । राती साढे दश बजेसम्म मन्त्रोच्चारण पश्चात् रामजानकीको विवाहमहोत्सव सम्पन्न हुने जानकी मन्दिरका महन्थ राम तपेश्वर दासले जनाएका छन् ।
तपाईको प्रतिक्रिया !