मधेश प्रदेशका मुख्यमन्त्री लालबाबु राउतकी श्रीमती जलेखा खातुनले स्थानीय तहको निर्वाचनमा हार ब्यहोरेकी छन्।
जलेखा जनता समाजवादी पार्टी (जसपा) बाट पर्साको जगरनाथपुर गाउँपालिकाको उपाध्यक्ष पदमा उम्मेदवार बनेकी थिइन्। उनले तीन हजार १२३ मत प्राप्त गर्दै तेस्रो स्थान प्राप्त गरेकी छन्।
जगरनाथपुरको उपाध्यक्षमा नेपाली कांग्रेसकी बबिता सिंहले पाँच हजार ५३१ मत सहित विजयी भएकी छन्। नेकपा (एमाले) की मीरादेवी कुर्मीले तनी हजार ३४५ मत ल्याएर दोस्रो भएकी छन्।
यस्तै‚ मुख्यमन्त्री राउतका पूर्व स्वकीय सचिव दीपक यादव पनि पराजित भएका छन्। उनी निर्वाचन हुनुभन्दा केहीअघि स्वकीय सचिवबाट राजीनामा दिएर जसपाबाट पर्साको पटेर्वासुगौली गाउँपालिकाको मेयरको उम्मेदवार बनेका थिए। यस गाउँपालिकामा नेपाली कांग्रेसका दिनेश कुमार चौधरी थारु पाँच हजार १४४ मत सहित विजयी भएका छन्।
दिनेशले एमालेका हरिनारायण चौधरीलाई पराजित गरेका हुन्। निवर्तमान अध्यक्ष हरिनारायणले तीन हजार ९४४ मत पाएका छन्। नेपाल सुशासन पार्टीका लालबाबु महरले ७२३ मत र जसपाका दीपकले ४६९ मत पाएका छन्। दीपकले जमानत समेत जोगाउन सकेन्न।
त्यस्तै धनुषाको कमला नगरपालिकाको मेयरमा उठेका पशुपति कांग्रेस उम्मेदवार विशेश्वर प्रसाद यादवबाट एकहजार भन्दा बढी मतले पराजित भए। विशेश्वर ३८८७ मत ल्याएर विजयी हुँदा दोश्रो नम्बरमा पशुपति २८५९ मतमा सीमित भएर पराजय बेहोरेका छन्।
तपाईको प्रतिक्रिया !