कुष्ठरोगको प्रभावकारी उपचार, नियन्त्रण तथा नयाँ बिरामीको खोज तलासका लागि धनुषा जिल्लामा विशेष अभियान चलाउने भएको छ । मधेस प्रदेशको स्वास्थ्य निर्देशनालयले आज जनकपुरधाममा स्थानीय तहका प्रमुख, उपप्रमुख, प्रमुख प्रशासकीय अधिकृत एवं स्वास्थ्य शाखाका प्रतिनिधि सहितका सरोकारवाला बिचमा अभिमुखीकरण कार्यक्रम गरेको छ ।
कार्यक्रममा सहभागीहरूले नेपाल सरकारले लिएको लक्ष्य पुरा गर्नका लागि धनुषामा तीन वर्षका लागि शुरु हुन लागेको कुष्ठरोगी पत्ता लगाउने अभियान सफल बनाउनका लागि पालिकाहरूको साथ तथा सक्रियता आवश्यक भएकोमा जोड दिनुभयो ।
एन एल आर नेपालको सहयोगमा शुरु हुन लागेको अभियानको बारेमा जानकारी दिने उद्देश्यले आयोजना गरिएको अभिमुखीकरण कार्यक्रममा सहभागी स्थानीय जनप्रतिनिधिहरूले अभियान सफल बनाउन पालिकाले पूर्ण रुपमा साथ दिने बताउनुभयो ।
कार्यक्रममा जिल्ला समन्वय समिति धनुषाका प्रमुख रामदेव वनरैत यादवले कुष्ठरोग निवारण गर्ने नेपाल सरकारको लक्ष्य पुरा गर्नका लागि धनुषामा सञ्चालन हुने अभियान सफल बनाउन हरेक पालिकाले सहयोग गर्नुपर्ने धारणा राख्नुभयो ।
सामाजिक विकास मन्त्रालयका सचिव ईमनारायण श्रेष्ठले कुष्ठरोगी पत्ता लगाउने तथा उनको सम्पर्कमा रहेकाहरूलाई औषधि खुवाउने अभियानले कुष्ठरोग निवारणमा महत्त्वपूर्ण योगदान पुग्ने बताउनुभयो ।
धनुषाका प्रमुख जिल्ला अधिकारी सुरेन्द्र पौडेलले कुष्ठरोगको निवारणका लागि धनुषा जिल्लामा स्थानीय जनप्रतिनिधिहरूले बढी मेहनत गर्न आवश्यक भएको बताउनुभयो ।
जनकपुरधाम उपमहानगरपालिकाका उपप्रमुख रिता कुमारी मिश्रले जनकपुरधाम कुष्ठरोगको दृष्टिकोणले उच्च जोखिममा रहेको बताउँदै कुष्ठरोगको निवारण अभियानमा उपमहानगरपालिकाले पुरा साथ दिने बताउनुभयो ।
मधेस प्रदेशका स्वास्थ्य निर्देशक विजय कुमार झाले स्थानीय सरकारको साथ तथा सहयोग विना कुष्ठरोगको निवारण कठिन भएको बताउँदै यसका लागि जनप्रतिनिधिहरूको सहयोग आवश्यक भएको बताउनुभयो ।
कार्यक्रममा विभिन्न पालिकाका प्रमुख तथा उपप्रमुखहरूले निक्कै राम्रो कार्यक्रम भएकाले यसमा आफूहरूको पूर्ण साथ र सहयोग रहने बताउनुभयो ।
कार्यक्रममा एन एल आर नेपालका अध्यक्ष प्रकाश वाग्लेले देशमा नै सबैभन्दा बढी कृष्ठरोगी मधेस प्रदेशमै रहेको बताउनुभयो ।
हाल मधेस प्रदेशमा १ हजार ३ सय ४७ केश रहेकोमा ६ सय ३८ जनाले औषधि सेवन गरेर निको भएका छन् भने ६ सय ७७ जना बाँकी रहेको र नियमित औषधि सेवन गरिरहेको स्वास्थ्य निर्देशनालयका क्षय कुष्ठ अधिकृत राजवीर यादवले जानकारी दिनुभयो ।
अहिले धनुषामा १ सय १३, महोत्तरीमा ६०, सर्लाहीमा ८७, सिराहामा ६८, सप्तरीमा ३९, रौतहटमा १ सय ५, बारामा १ सय तथा पर्सामा ९८ जना कुष्ठरोगी रहेको अधिकृत यादवले जानकारी दिनुभयो ।
तपाईको प्रतिक्रिया !