काठमाडौं- राष्ट्रिय सभा अध्यक्ष गणेशप्रसाद तिमिल्सिनाले कोभिड-१९ विरुद्धको खोप पहुँच बाहिर रहेका जनतालाई खोप लगाउन जनप्रतिनिधिले र राजनीतिक दलले सहजीकरण गर्नुपर्ने बताउनुभएको छ।
काठमाडौंमा बुधबार आयोजित ‘कोभिड-१९ विरुद्धको खोपसम्बन्धी जोखिम सञ्चार तथा सामुदायिक सहभागिता’ सम्बन्धी एक दिने अन्तर्क्रिया कार्यक्रमको उद्घाटन सत्रमा उहाँले १३ प्रतिशत नागरिकले खोप लगाउन नमानेको भन्ने रिपोर्ट आएको र केही पहुँच बाहिर रहेकाले जनप्रतिनिधिले पनि खोपको पहुँचमा ल्याउन सहयोग गर्नुपर्ने बताउनुभएको हो।
राष्ट्रिय सभामा चार वर्षे कार्यकाल बाँकी रहनुभएका तथा नवनिर्वाचित सदस्यहरू सहभागी कार्यक्रममा अध्यक्ष तिमिल्सिनाले भन्नुभयो, ‘करिब १३ प्रतिशत जनसंख्या खोप लगाउन नमानिरहेको भन्ने कुरा छ। यो भ्रमका कारणले हुन सक्छ। यसमा हामीले जनतालाई सचेत गराएर खोप अभियानमा सहभागी गराउन हामी जनप्रतिनिधिको महत्वपूर्ण भूमिका रहन्छ।’
राष्ट्रिय सभामा निर्वाचित भएर आउनुभएका नयाँ सदस्यहरुलाई बधाई तथा स्वागत गर्दै अध्यक्ष तिमिल्सिनाले चैत्र मसान्तसम्म सरकारले सबै जनतालाई खोप लगाउने लक्ष्य लिएको बताउँदै त्यसलाई सफल बनाउन आ-आफ्नो ठाउँबाट भूमिका खेल्न आग्रह गर्नुभयो।
‘अब स्थानीय चुनाव आउँदैछ। पार्टीका कार्यक्रममा स्वास्थ्यलाई पनि प्रथामिकता दिनुपर्छ,’ उहाँले भन्नुभयो, ‘राजनीतिक दलहरुले चुनावमा भोट माग्ने कामसँगै खोप लगाउनसमेत जनतालाई हात जोडेर अनुरोध गर्न म अनुरोध गर्दछु।’
स्वास्थ्य तथा जनसंख्या मन्त्रालयको आयोजना, संघीय संसदको संयोजन र विश्व स्वास्थ्य संगठन नेपालको प्राविधिक सहयोगमा आयोजित अन्तर्क्रिया कार्यक्रममा बोल्नुहुँदै स्वास्थ्य मन्त्री विरोध खतिवडाले चैत्र मसान्तसम्म १८ वर्ष माथिका सबै नागरिकलाई खोप लगाइ सकिने जानकारी गराउँदै कहीँ कतै खोपको पहुँच नपुगेको भए सरकारलाई जानकारी गराउन आग्रह गर्नुभयो।
कार्यक्रममा बोल्दै राष्ट्रिय सभाका उपाध्यक्ष शशीकला दाहालले कोभिड बारे धेरै कुरा जानकारी नहुँदा सुरुवातमा धेरै समस्या भोग्नुपरे पनि अहिले सहज भएको बताउनुभयो। एउटा मात्रै गलत सूचना जाँदा धेरै जनामा असर पर्ने बताउँदै उहाँले सांसद तथा जनप्रतिनिधिले बोल्दा सही वा गलत छुट्याएर मात्रै बोल्न अनुरोध गर्नुभयो।
स्वास्थ्य मन्त्रलायका सचिव डा. रोशन पोखरेलले संघ, प्रदेश र स्थानीय तहका स्वास्थ्य संरचनाबारे जानकारी गराउँदै कोभिड व्यवस्थापन, नियन्त्रण र खोप लगाउनका लागि संघीय संरचनाअनुसार तीन तहको सरकारले मिलेर काम गर्दा स्वास्थ्यका कार्यक्रम जनतामा पुर्याउन सहज भएको बताउनुभयो।
स्वास्थ्य मन्त्रलायका प्रवक्ता डा. संगीता मिश्राले हालसम्म ३ करोड ७२ लाखभन्दा बढी डोज खोप ७४ प्रतिशतलाई पहिलो मात्रा र ६०.१% प्रतिशतलाई दोस्रो डोज लगाइसकिएको जानकारी दिनुभयो। सरकारले जनतालाई कोभिडबारे सचेत गराउन, महामारी नियन्त्रण तथा कोभिडबिरुद्धको खोप लगाउनका लागि जनतालाई आग्रह गर्न जनप्रतिनिधिको भूमिका महत्वपूर्ण हुने मिश्राले बताउनुभयो।
कार्यक्रममा बोल्दै विश्व स्वास्थ्य संगठनका नेपाल प्रमुख राजेश संभाजीराव पाण्डवले कोभिडका कारण हामीले आफ्नो परिवारको महत्व र हेरचाहमा समय दिएको बताउनुभयो।
जनता सामु जनस्वास्थ्य सम्बन्धी सुरक्षाका सन्देशहरु सञ्चार गर्न जनप्रतिनिधिको भूमिका महत्वपूर्ण हुने बताउँदै उहाँले भन्नुभयो, ‘जोखिम सञ्चार तथा सामुदायिक सहभागिताको महत्व विश्वव्यापी रुपमा बोध गरिएको छ।त्यसका लागि हामी सबै मिलेर काम गरौं।’
तपाईको प्रतिक्रिया !